Er ESB aðildarferlið mikilvægt kosningamál?

Nú fer að líða að kosningum og nokkur framboð hafa birt stefnumál sín.  Mikið er deilt um ESB aðildarviðræðurnar og hvort halda eigi þeim áfram. Þegar Samfylkingin tróð þessu máli í gegn á sínum tíma þá átti það ekki að taka nema 18 mánuði í mesta lagi og því lofað að eingöngu væri um samningarviðræður að ræða en ekki aðlögunarferli. Sjálfum leist mér vel á þá hugmynd að fá samning á borðið sem við gætum kynnt okkur og síðar kosið um. Nú eru hins vegar liðin 4 ár og einungis er búið að klára þriðjung af samningsköflum ESB eða 11 af 33 köflum. Allir erfiðustu kaflarnir eru eftir eins og sjávarútvegur og landbúnaður t.d. 

Margir tala fyrir því að með inngöngu í ESB leysist öll okkar vandamál. Við fáum sterkari gjaldmiðil, verðtrygging og gjaldeyrishöft hverfa og ég veit ekki hvað og hvað. Þessu er haldið blákalt fram án þess að langþráður samningur liggi fyrir.  Á sama tíma er því haldið fram að glórulaust sé að kjósa um framhald viðræðna því engin samningur liggi fyrir og því í raun ekki verið að kjósa um neitt. Hvernig er hægt að lofa öllu fögru áður en samningur liggur fyrir?

Við þurfum að vera raunsæ á það að umsóknarferlið er ekki á þeim stað sem lagt var upp með og hljótum að gera þá kröfu að gert sé grein fyrir því hvað tafðist, hvað hefur áunnist, hefur verið um einhverja aðlögun að ræða, hver hefur kostnaðurinn verið og hvenær er búist við að samningar náist. Með því að fá þessar upplýsingar á borð þá ætti að vera raunhæft að kjósa um hvort halda eigi viðræðum áfram eða að slíta þeim. 

Nú veit ég ekki til þess að ný tímaáætlun hafi verið gerð um samningslok við ESB en ég á erfitt með að sjá að það takist að loka 22 köflum á næstu 4 árum, sérstaklega í ljósi þess að hlé hefur verið gert á samningsviðræðunum. Það bendir því flest til þess að aðildarumsókn að ESB muni ekki spila neitt hlutverk í að aðstoða heimilin í landinu eða atvinnulífið næstu árin og því eðlilegt að spyrja sig hvort maður eigi að láta þetta mál ráða atkvæði sínu í næstu kosningum.

 

Athugasemdir

[Jón Steinar Ragnarsson, 18.3.2013 kl. 00:49]

Það verður kosningamál á meðan barist er fyrir aðlögun og henni haldið áfram þvert ofan í fullyrðingar um að hlé hafi verið gert.

Stjórnarskrármálið er grundvallarmál í aðlöguninni aem haldið er til streitu með blekkingum og lýðskrumi. Án þeirra breytinga verður ekki gengið í sambandið. Feneyjanefnd evrópuráðsins hefur ekki enn lagt blessun sína yfir málið svo enn verður haldið,áfram að þvæla um það þar til þeir verða ánægðir. Það sem stendur í þeim nú eru of margir fyrirvarar á framsalsákvæði og málskotsréttur forseta.

Það er kominn tími til að ræða þetta mál á þeim nótum sem það er til komið og þeim markmiðum sem liggja að baki. Orweelískt Lýðskrumið og spuninn hefur sannfært fjölda manns um að þetta sé eitthvað réttlætismál og í höndum grasrótarinnar. Nú er mál að linni.

http://www.visir.is/stjornarskra-breytt-fyrir-esb-adild/article/200938564492

[Pétur Harðarson, 18.3.2013 kl. 15:44]

Já það læðist að manni grunur að ESB aðildarferlið hafi spilað stórt hlutverk í bæði stjórnarskrármálinu og Icesave deilunni.

Það hlýtur líka að teljast ótrúlegur dómgreindarskortur að hafa ráðist í þetta stóra verkefni með þeim hætti sem var gert. Í fyrsta lagi var tímasetningin afleit. Á þessum tíma þurfti að vinna í að þjappa þjóðinni saman, ekki stía henni í sundur. Þá var afar lítill meirihluti fyrir þessu inni á þingi og í raun þurfti að frú Jóhanna að brjóta á stjórnarskránni með því að hóta VG liðum öllu illu á þinginu. Svo var ekki nægur þjóðarvilji fyrir þessu til að frú Jóhanna þyrði að setja þetta í þjóðaratkvæðagreiðslu.

Það er deginum ljósara að stjórnarliðar geta ekki kennt öðrum en sjálfum sér um hvernig þetta mál hefur klúðrast. Nú þarf bara að skoða þetta mál gaumgæfilega og athuga stöðuna á því. Þetta hefur tekið allt of langan tíma og því ekkert athugavert við að stoppa aðeins og taka púlsinn. Jóhanna hefur nú alltaf talað fyrir lýðræði á tyllidögum og nú þarf hún einfaldlega að beygja sig undir það.